Songs

 

కొసరాజు గారి పాటలంటేనే ఒక కొత్తదనం, ఒక సామాజిక సందేశం. ఆయన పాటలన్నీ వాస్తవ జీవన శైలికి దగ్గరగా ఉండి అందరినీ ఇట్టే ఆకట్టుకొంటాయి. ఆ భావాలకు, స్వరబ్రహ్మ కె.వి.మహదేవన్ గారి జానపద స్వరం కూడా కలిస్తే, ఆ మాధుర్య రసాన్ని ఘంటసాల గారు తన గళంతో వినిపిస్తే, ఇక ఆ పాట అజారామరము కాక ఇంకేమౌతుంది. ఈ పాట సన్నివేశం నాటి ప్రేమికుల మనోభావాలకు అద్దం పడుతుంది. ‘తాళి కట్టకుండా ముట్టుకుంటే తప్పు కాదా’ అంటే ఆనాడు యదార్థం మరి నేడు అర్థం లేదు. మారుతున్న కాలంతో మనుషులే కాదు వారి ఆలోచనా సరళి కూడా మారుతుంది. అంతేకాని తప్పొప్పులను చర్చించే స్థలం ఈ శీర్షిక కాకూడదు. ఇంకెందుకు పదండి పాట వింటూ మనం కూడా పాడుకుందాం.


చిత్రం: మంచి మనసులు (1962)

సంగీతం:  కె.వి. మహదేవన్

గేయ రచయిత: కొసరాజు

గానం: ఘంటసాల, జమునారాణి


పల్లవి:

తప్పూ...తప్పూ

మావ మావ మావా..ఆ..ఆ.. మావ మావ మావా..ఆ..ఆ..
ఏమే ఏమే భామా..ఆ..ఆ.. ఏమే ఏమే భామా...

పట్టుకుంటే కందిపోవు.. పండు వంటి చిన్నదుంటే
చుట్టు చుట్టు తిరుగుతారు మర్యాదా..
పట్టుకుంటే కందిపోవు.. పండు వంటి చిన్నదుంటే
చుట్టు చుట్టు తిరుగుతారు మర్యాదా..
తాళి కట్టకుండ ముట్టుకుంటే తప్పుకాదా..
మావ మావ మావా..ఆ..ఆ.. మావ మావ మావా..ఆ..ఆ..

వాలు వాలు చూపులతో గాలమేసి లాగిలాగి.. ప్రేమలోకి దింపువాళ్ళు మీరు కాదా
ఓహో..
వాలు వాలు చూపులతో గాలమేసి లాగిలాగి.. ప్రేమలోకి దింపువాళ్ళు మీరు కాదా

చెయ్యి వెయ్యబోతే బెదురుతారు వింత కాదా..
ఏమే ఏమే భామా..ఆ..ఆ.. ఏమే ఏమే భామా..

 

చరణం 1:

నీ వాళ్ళు నా వాళ్ళు రాకనే.. మనకు నెత్తి మీద అక్షింతలు పడకనే
నీ వాళ్ళు నా వాళ్ళు రాకనే.. మనకు నెత్తి మీద అక్షింతలు పడకనే
సిగ్గు దాచి..
ఓహో..

సిగ్గు దాచి ఒకరొకరు సిగను పూలు కట్టుకోని..
టింగురంగయంటు ఊరు తిరగొచ్చునా
లోకం తెలుసుకోక మగ వాళ్ళు మెలగొచ్చునా..
మావ మావ మావా..ఆ..ఆ.. మావ మావ మావా..ఆ..ఆ..

 

చరణం 2:

హోయ్ హోయ్ హోయ్..
హోయ్ హోయ్ హోయ్..

కళ్ళు కళ్ళు కలుసుకోను రాక ముందే.. అహా కప్పుకున్న సిగ్గు జారి పోకముందే
కళ్ళు కళ్ళు కలుసుకోను రాక ముందే.. అహా కప్పుకున్న సిగ్గు జారి పోకముందే
మాయ చేసి..
ఓహో..
మరులుగొల్పి..
ఓహో..

మాయ చేసి మరులుగొల్పి మాటలోన మాట కల్పి..
మధురమైన మా మనసు దోచవచ్చునా
నీవు మర్మమెరిగి ఈ మాట అడగవచ్చునా..

ఏమే ఏమే భామా..ఆ..ఆ..
ఏమే ఏమే భామా..

 

చరణం 3:

పడుచుపిల్ల కంట పడితే వెంట పడుదురు..
అబ్బో వలపంతా వలకబోసి ఆశ పెడుదురూ..ఊ..
పడుచుపిల్ల కంట పడితే వెంట పడుదురు..
అబ్బో వలపంతా వలకబోసి ఆశ పెడుదురు...
పువ్వు మీద..
ఓహో..
పువ్వు పువ్వు మీద వాలు పోతు తేనె టీగ వంటి..
మగవాళ్ళ జిత్తులన్ని తెలుసులేవయ్యా
మా పుట్టి ముంచు కథలన్నీ విన్నామయ్యా..
మావ మావ మావా..ఆ..ఆ.. మావ మావ మావా..ఆ..ఆ..

చరణం 4:

హోయ్ హోయ్ హోయ్..హోయ్ హోయ్ హోయ్..

కొత్త కొత్త మోజుల్ని కోరువారు.. రోజు చిత్రంగా వేషాలు మార్చువారూ..ఊ..
కొత్త కొత్త మోజుల్ని కోరువారు.. రోజు చిత్రంగా వేషాలు మార్చువారు
టక్కరోళ్ళుంటారు టక్కులు చేస్తుంటారు..
నీవు చెప్పు మాట కూడ నిజమేనులే
స్నేహం దూరంగా ఉన్నప్పుడే జోరవునులే..

అవునే అవునే భామా.. అవునే అవునే భామా..
కట్టు బాటు ఉండాలి గౌరవంగ బతకాలి..
ఆత్రపడక కొంత కాలమాగుదామయా
కట్టు బాటు ఉండాలి గౌరవంగ బతకాలి..
ఆత్రపడక కొంత కాలమాగుదామయా
ఫెళ్ళున.. పెళ్లైతే.. ఇద్దరికి అడ్డులేదయా..

మావ మావ మావా..ఆ..ఆ.. మావ మావ మావా..ఆ..ఆ..

 

 

divider

 

ఈ శీర్షిక గురించి మీ అభిప్రాయాలను మాతో పంచుకోవచ్చును. ఎడిటర్@సిరిమల్లె.కాం ద్వారా మాకు ఇ-మెయిల్ చేయండి.

సంపాదకులు: మధు బుడమగుంట, ఉమ బుడమగుంట (కాలిఫోర్నియా, యు.ఎస్.ఎ.)

మనిషి తనని తానూ తెలుసుకుంటే భగవంతుణ్ణి తెలుసుకున్నట్లే – రామకృష్ణ పరమహంస